Årsmelding for Bulandet Idrettslag 2011

Styret:

Leiar: Eivind Norstrand (på val kvart år)

Nestleiar: William Rogne (på val i 2013)

Sekretær: Kari Helen Blikås (på val i 2013)

Kasserar: Synnøve Melvær (på val i 2012)

Styremedlem: Randi Fedøy (på val i 2012)

1.vara: Sissel K. Steinsvik (på val i 2012)

Styret sitt arbeid og representasjon:

BIL hadde årsmøte den 17.03.11. Styret har hatt 3 styremøter og handsama 9 saker.

Kasserar deltok på årsmøte i Askvoll idrettsråd i mars 2011 og vart vald som 3. vara i rådet.

BIL arrangerte for første gong Jonsok Cup i Bulandet den 18.06.11 der bedrifter og andre frå Bulandet og Værlandet vart inviterte.
Målet med cupen var å ha ei uhøgtidleg samling med mykje moro på tvers av aldersgrupper. Miksa lag med maks 6 personar frå 8. klasse og oppover, og med minimum ein person frå det motsette kjønn.
Vandrepokalar til beste lag og til det laget som hadde best show.
Bedrifter og lag vart utfordra til å stille i kostyme eller arbeidsantrekk, noko som var svært populært.
Cupen gav inntekt til BIL gjennom inngangsbillett (trekning av vinst på billetten) og sal av mat og drikke.
BIL satsar på å arrangere Jonsok Cup i 2012 også.

Bulandet idrettslag, Værlandet idrettslag og Barnas Turlag arrangerte nissemarsj i desember ved Værlandet gjesteheim. Arrangementet var knytt til tenning av julegran.

BIL hadde stand på marknadsdagen under Nordsjøporthelga i Bulandet/Værlandet første helga i juli, der vi hadde tilbod om aktivitet for dei som var interesserte.

Det vart ikkje arrangert fellessamling for idrettslaga i 2011 i regi av Askvoll idrettsråd.

Hausten-11 deltok BIL på møte og synfaring på idrettsbanene på Værlandet og i Bulandet vedk. søknad om ballbinge. Det møtte representantar frå Værlandet Idrettslag, Sogn og Fjordane idrettskrins, Askvoll idrettsråd og leverandør av ballbinge. Begge idrettslaga vil jobbe vidare med planar om ballbinge i Bulandet og på Værlandet.

Aktivitetar:

Aerobic – gruppeleiar: Turid Norstrand.

Har hatt to treningar pr. veke (måndag og onsdag frå kl. 19.00 – 20.30) i gymsalen på skulen. Styrketrening og uttøying for vaksne. Oppmøtet kan variere frå ca. 10 – 20 personar. Deltakarane har med vekter og matter sjølve. Har pause i sommarferien når skulen er stengd.

Fotball – gruppeleiar: Bill Steinsvik.

Har hatt årsinndeling i to grupper: ei gruppe frå 3. - 7. klasse med 10 – 16 deltakarar, og ei gruppe frå 8. - 10. klasse med 4 – 9 deltakarar.

Gjennom heile skuleåret har det vore to treningar kvar tysdag frå kl. 17.15 – 18.30 og frå kl. 18.30 – 19.45. Treningane har vore på bana eller i gymsalen på skulen.

Har pause i sommarferien når skulen er stengd.

Fotballgruppa har ikkje delteke på kurs eller turneringar i 2011.

BIL v/fotballgruppa har hausten 2011 skaffa eit brukt kunstgras dekke til idrettsbana.

Volleyball 12 – 16 år. Gruppeleiar: Asgeir Torvanger.

Dette er volleyballtreningar for dei som går i 7. - 10. årstrinn på skulen, og som i 2011 fyller 12 til 16 år. Trening ein gong pr. veke (torsdag) i gymsalen på skulen frå kl. 18.00 – 19.00. Er ein aktivitet som føl skuleåret, med start etter haustferien og slutt i juni.

Volleyball vaksne over 16 år. Gruppeleiar: Asgeir Torvanger.

Trening ein gong pr. veke (torsdag) i gymsalen på skulen frå kl. 19.00 – 21.00. Er ein aktivitet som føl skuleåret, med start etter haustferien og slutt i juni. Stabilt og godt oppmøte, gjennomsnitt på 15 – 20 personar kvar gong frå Bulandet og Værlandet.

Fotballtennis vaksne over 16 år. Gruppeleiar: William Rogne.

Trening ein gong pr. veke (fredag) i gymsalen på skulen frå kl. 21.00 – 23.00. Halvårsaktivitet med start medio oktober fram til sommarferien. Tida er berekna slik at elevar frå vidaregåande skular kan delta når dei kjem heim til helgar. Stabilt oppmøte med ca. 5 personar kvar gong.

Medlemmar i BIL:

Ved utgangen av 2011 var det registrert totalt 82 betalande aktive medlemmar i laget og 23 støttemedlemmar. Det er fleire frå Værlandet som deltek på fotball og volleyballaktivitetar i BIL. Laget må ha fokus på at medlemsavgift vert innbetalt av alle born og vaksne som nyttar BIL sine tilbod.

Vedlikehald og investering:

Bulandet idrettslag eig fotballbana med tilhøyrande utstyr (lyskastarar m.v.) Utstyr- og salsboda ved fotballbana skal ferdigstillast med takstein/plater og innreiing. I 2011 kjøpte BIL

fire benkar frå Vevang produksjon til Jonsok Cupen /idrettsbana. I tillegg fekk BIL eit brukt kunstgras dekke frå Hyllestad som skal leggjast på idrettsbana. I tillegg til tranportkostnadene vil det bli utgifter til klargjering av bana.

Økonomi:

Laget har ein bra og stabil økonomi. Grasrotandelen gjev god inntekt til laget. For å sikre fullfinansinering av Bulandet badebasseng har BIL tidlegare sett av kr. 50.000,- i øyremerka midlar til dette. I tillegg får bassengnemnda halvparten av inntektene frå Grasrotandelen. Viss bassenget ikkje vert realisert går øyremerka midlar samt Grasrotandelen tilbake til idrettslaget.

Viser elles til kommentarer frå kasserar, rekneskap for 2011 og uttale frå revisorar.