Kronprinsparet i Bulandet 05.09.06

Det er ei stor glede og ære for meg å kunne ønskje vårt høgvyrde og kjære kronprinspar velkommen til Sogn og Fjordane og til Askvoll kommune.

Likeeins ønskjer eg fylkesmann, politimeister, representantar frå Slottet og alle andre velkommen.

Askvoll er distriktskommunen som ikkje har mist motet sjølv om utfordringane er store.

Vi kjenner det godt og trygt å bu her og vi vonar at det skal vere slik i framtida og.

Men det handlar om mot til å ta fatt sjølv.

Vi har framtidstru og vilje til å ta fatt.

Under ein høg himmel og flytande på havet ligg Bulandet og Værlandet.

Gnistrande stjernehimmel, raud kveldsol over blomstrande scillaverna, milde sommarvindar eller rasande storm.

Dette nære samlivet med naturen og elementa har forma folket her.

Dei er stolte og rakrygga med ein stor kjærleik til heimstaden sin.

Dei er opne, rause og gjestfrie med slåande replikkar og særeigen humor.

Her har dei funne leveveg og innkome av det havet har gitt dei.

Men dei har måtta lære seg å leve med det havet har tatt frå dei.

To livskraftige samfunn med initiativ og kreativitet til å skape nytt.

Det garanterer for at desse bygdene er liv laga.

De kjem hit for å møte oss og vi gler oss over å få møte dykk.

Når de reiser vidare, har de berre sett ein liten flik av mangfaldet og øyriket.

Likevel vonar eg de kan ta med dette som eit godt minne.

Vi er utruleg glade og stolte over at de valde å leggje turen til Askvoll.

Vi tek i mot dykk med kjærleik og varme,

og eg er viss på de kjenner kjærleiken og varmen støyme dykk i møte.

Ver hjarteleg velkomne til oss.